VUMBI NA MOSHI WA SUMU UMESABABISHA VIFO VYA WATU LAKI MOJA INDONESIA

Matokeo ya uchunguzi mpya uliofanywa yameonyesha kuwa kuna uwezekano kwamba vumbi la moshi wa sumu uliotokana na moto uliowashwa mwaka uliopita katika maeneo ya misitu ya Indonesia vimesababisha vifo vya kabla ya wakati vya watu wapatao laki moja katika maeneo hayo.

Matokeo ya uchunguzi huo uliofanywa na watafiti wa vyuo vikuu vya Harvard na Columbia nchini Marekani unaonyesha kuwa kuna uwezekano mkubwa sana kuwa "vumbi na moshi thakili" ambao ulitanda katika maeneo hayo ya Indonesia kuanzia mwezi Julai hadi Oktoba mwaka uliopita wa 2015 ndio uliosababisha vifo vya kabla ya wakati vya watu zaidi la elfu tisini.

Matokeo ya uchunguzi huo yaliyochapishwa leo katika jarida la intaneti la "Barua za Utafiti wa Mazingira" aidha yamekadiria kuwa vumbi hilo la moshi huenda ndilo lililosababisha pia vifo vya watu wengine elfu moja katika nchi jirani na Indonesia za Singapore na Malaysia.

Hii ni katika hali ambayo serikali ya Indonesia ilikuwa imetangaza hapo awali kuwa ni watu elfu 19 tu ndio waliofariki dunia kutokana na athari ya vumbi na moshi huo wa sumu.

Watoto wengi hukimbiziwa hospitali Indonesia kutokana na athari za vumbi na moshi wa sumu

Vumbi na moshi uliotokana na moto uliowashwa mwaka uliopita katika maeneo ya misitu nchini Indonesia uliendelea kutanda katika maeneo hayo kwa muda wa wiki kadhaa.

Moto huo uliwashwa kwa lengo la kupatikana maeneo zaidi ya ardhi kwa ajili ya kilimo cha michikichi ya uzalishaji mafuta ya mawese.../