Polisi nchini Kenya wamelazimika kutumia gesi
ya kutoa machozi kuwatawanya wafuasi wa muungano wa upinzani NASA
walioandamana katika miji ya Nairobi na Kisumu kushinikiza mabadiliko
katika Tume Huru ya Uchaguzi IEBC.
Taarifa
zinasema mtu mmoja amefariki dunia kufuatia mshtuko wakati polisi
walipokuwa wakiwatawanya waandamanaji katika Kaunti ya Siaya magharibi
mwa Kenya ambayo ni ngome ya kinara wa upinzani Raila Odinga.
Muungano
wa upinzani nchini Kenya unasema unaongoza maandamano kushinikiza
mabadiliko ndani ya tume hiyo kabla ya kufanyika uchaguzi wa marudio wa
urais tarehe 26 mwezi huu wa Oktoba.
Kiongozi
wa muungano huo Raila Odinga ametangaza kuwa, hawatakubali kufanyika
uchaguzi huo iwapo Mkurugenzi Mkuu wa Tume hiyo Ezra Chiloba na maafisa
wengine wataendelea kuandaa uchaguzi mpya ambao utakuwa ni mchuano kati
ya Odinga na Rais Uhuru Kenyatta.
Serikali ya Kenya imesema maandamano ya muungano wa upinzani
yatadhibitiwa na vitengo vya kuimarisha usalama vya nchi hiyo. Rais
Uhuru Kenyatta amesema kuwa ni haki ya wafuasi wa Nasa na viongozi wao
kuandamana lakini ameonya kuwa serikali haitawaruhusu wasababishe fujo
na matatizo kwa wengine wasiohusika na maandamano.
0 comments: