Rais Hassan Rouhani ametuma salamu za mkono
wa pongezi, heri na baraka kwa viongozi wa nchi za Kiislamu kwa mnasaba
wa maadhimisho ya kukumbuka kuzaliwa Mtume Mtukufu, Nabii Muhammad
Al-Mustafa SAW.
Katika ujumbe wa salamu hizo alizowatumia viongozi wa nchi za
Kiislamu, Rais wa Jamhuri ya Kiislamu ya Iran amesema ana matumaini
kwamba kwa baraka za maulidi matukufu ya Bwana Mtume SAW ambaye ni mtoa
bishara ya heri na rehma na dhihirisho la akhlaqi bora na ruwaza njema,
mfungamano wa udugu na urafiki baina ya mataifa ya Waislamu utazidi
kustawi zaidi.
Katika salamu zake hizo, Rais wa Jamhuri ya Kiislamu ya Iran
amesisitiza kuwa: Nchi za Kiislamu zinapaswa kuitumia na kufaidika nayo
mirathi adhimu ya Bwana Mtume SAW kwa kufanya juhudi na bidii zaidi za
kuwabainishia na kuwaonesha walimwengu sura ing'arayo ya rehma na amani
ya Uislamu.
Aidha amebainisha kwamba kwa kushikamana na umoja na kupata funzo
kutoka kwenye chemchemi safi ya elimu ya Utume, Umma wa Kiislamu utaweza
kurejesha kikamilifu amani, utulivu na uthabiti katika nchi za
Kiislamu.
Kwa mtazamo wa madhehebu ya Suni, tarehe 12 Mfunguo Sita, Rabiul
Awwal, na kwa mtazamo wa madhehebu ya Shia, tarehe 17 ya mwezi huo ndio
siku aliyozaliwa Bwana Mtume Muhammad SAW. Imam Khomeini (RA) mwasisi wa
Jamhuri ya Kiislamu ya Iran alitangaza kipindi cha baina ya tarehe
mbili hizo kuwa ni Wiki ya Umoja ili kuimarisha umoja wa Ulimwengu wa
Kiislamu.../
0 comments: