UCHAGUZI WA MARUDIOA ZANZIBAR KESHO

Uchaguzi uliofutwa mwaka jana katika visiwa vya Zanzibar ambayo ni sehemu ya Jamhuri ya Muungano wa Tanzania unatarajiwa kufanyika Jumapili ya kesho huku Tume ya Uchaguzi (ZEC) ikitangaza kuwa, maandalizi yote kwa ajili ya uchaguzi huo yamekamilika.

Licha ya Chama cha Wananchi CUF kutangaza kuwa, hakitasimamisha mgombea wake katika uchaguzi wa kesho, lakini karatasi za kupigia kura zilizowasili hivi karibuni zikitokea nchini Afrika Kusini zina picha za wagombea wote 14 wa kiti cha Urais wa Zanzibar.

Baadhi ya wachambuzi wa mambo wanaamini kuwa, kurudiwa uchaguzi huo ndio utakaokuwa ufumbuzi wa mgogoro wa kisiasa Zanzibar ulioibuka mwaka jana baada ya matokeo ya uchaguzi wa Oktoba 25 kufutwa, lakini weledi wengine wa mambo wanasema, kutoshiriki chama cha CUF katika uchaguzi wa kesho kutapelekea mgogoro huo uendelee kushuhudiwa hasa kwa kutilia maanani nguvu kubwa ya chama hicho katika siasa za Zanzibar.

Zanzibar ambayo ni sehemu ya Jamhuri ya Muungano wa Tanzania iliingia katika mgogoro wa kisiasa mwezi Oktoba mwaka jana baada ya Mwenyekiti wa Tume ya Uchaguzi visiwani humo, Jecha Salim Jecha kufuta matokeo ya uchaguzi kwa kile alichokiita ukiukwaji wa sheria na utaratibu wakati wa zoezi la upigaji kura. Hatua hiyo ilichukuliwa katika hali ambayo matokeo yote ya uchaguzi wa majimbo 54 ya Baraza la Wawakilishi yalikuwa yameshatangazwa pamoja na karibu theluthi mbili ya kura za Urais.