WAFANYA ZIARA WAZIDI KUANDAMWANA AJALI NCHINI SAUDIA

Huku ulimwengu ukiwa bado haujasahau vifo vya kutisha vya maelfu ya mahujaji wa nyumba ya Mwenyezi Mungu nchini Saudia, wafanya umra wapatao 19, wamepoteza maisha katika ajali nyingine mbaya ya basi nchini humo.

Kwa mujibu wa duru za habari nchini Saudia, wafanya ziara hao raia wa Misri wamefariki dunia baada ya basi walilokuwa wakisafiria kupinduka. Basi hilo ambalo lilikuwa limebeba wafanya umra wapatao 44 wote kutoka Misri wakiwamo watoto wawili, lilipata ajali kati ya mji mtukufu wa Makkah na Madina. Watu wengine 22 wamejeruhiwa baadhi yao wakiwa na hali mbaya. Chanzo cha ajali hiyo bado hakijajulikana, ingawa ripoti za awali zinaeleza kuwa ni dereva kuzidiwa na usingizi. Hisham al Naqib, mmoja wa viongozi wa Wizara ya Mambo ya Nje nchini Misri amenukuliwa akisema kuwa, miili ya wahanga wa ajali hiyo iko hospitalini mjini Madina. Kwa upande wake, Nawaf al-Muhammad, mkuu wa idara ya usafirishaji ya mjini Madina amesema kuwa, kuna uwezekano mkubwa kwamba dereva alizidiwa na usingizi. Hii ni katika hali ambayo Ijumaa iliyopita, wafanya ziara 14 raia wa Palestina walifariki dunia katika ajali nyingine ya barabarani mjini Makka, Saudia. Vifo hivyo vinatokea katika hali ambayo hadi sasa ulimwengu wa Kiislamu unaendelea kuilalamikia Saudia juu ya uzembe wake katika kusimamia ibada ya Hija na kuitaka Riyadh ikabidhi jukumu hilo kwa nchi za Kiislamu.