Makamu wa Rais wa Jamhuri ya Muungano wa Tanzania, Mhe. Deogratius Ndejembi, kwa niaba ya Rais Dkt. Samia Suluhu Hassan, amekutana na kufanya mazungumzo na Rais wa Uganda, Mhe. Yoweri Kaguta Museveni, kuhusu maendeleo ya ujenzi wa Bomba la Mafuta Ghafi la Afrika Mashariki (EACOP), linalounganisha Hoima nchini Uganda na Chongoleani, Tanga nchini Tanzania.

Mazungumzo hayo yamefanyika katika Ikulu ya Entebbe nchini Uganda, yakilenga kuimarisha ushirikiano wa nchi hizo mbili katika utekelezaji wa miradi ya kimkakati, hususan katika sekta ya mafuta na gesi.

Mkutano huo umehudhuriwa na Naibu Waziri wa Mambo ya Nje na Ushirikiano wa Afrika Mashariki, Dkt. Ngwaru Maghembe; Balozi wa Tanzania nchini Uganda, Meja Jenerali Marco Gaguti; Katibu Mkuu wa Wizara ya Nishati anayeshughulikia mafuta na gesi, Dkt. James Mataragio; Kamishna wa Mafuta na Gesi, Goodluck Shirima, pamoja na Mkurugenzi Mtendaji wa Shirika la Maendeleo ya Petroli Tanzania (TPDC), Mussa Makame.

read more

Na Mwandishi wetu Dodoma 

Rais wa Jamhuri ya Muungano wa Tanzania, Mhe. Dkt. Samia Suluhu Hassan, leo Jumatano, Novemba 4, 2026, ameshiriki Uchaguzi Mdogo wa Ubunge wa Jimbo la Chamwino baada ya kupiga kura katika Kituo cha Kupigia Kura cha Ofisi ya Kijiji cha Chamwino, mkoani Dodoma.

Rais Samia alifika katika kituo hicho kushiriki zoezi la uchaguzi linalofanyika kwa ajili ya kumpata Mbunge mpya wa Jimbo la Chamwino, nafasi iliyokuwa wazi kufuatia aliyekuwa Mbunge wa jimbo hilo, Mhe. Deogratius Ndejembi, kuteuliwa kuwa Makamu wa Rais wa Jamhuri ya Muungano wa Tanzania.

Ushiriki wa Rais Samia katika zoezi hilo unaonesha umuhimu wa wananchi kutumia haki yao ya kikatiba ya kuchagua viongozi wanaowataka kuwawakilisha katika vyombo vya maamuzi.

Uchaguzi Mdogo wa Chamwino unawapa wapiga kura wa jimbo hilo fursa ya kuchagua mwakilishi mpya atakayechukua nafasi ya Ndejembi na kuendelea kusimamia masuala ya maendeleo pamoja na kuwakilisha wananchi wa Chamwino bungeni.

Ndejembi alikuwa Mbunge wa Jimbo la Chamwino kabla ya kuteuliwa kushika nafasi ya Makamu wa Rais, hatua iliyosababisha nafasi ya ubunge wa jimbo hilo kuwa wazi na hivyo kuhitajika kufanyika kwa Uchaguzi Mdogo.

Wananchi waliojiandikisha katika Daftari la Kudumu la Wapiga Kura wanashiriki katika uchaguzi huo kwa kutekeleza wajibu wao wa kuchagua kiongozi watakayempa dhamana ya kuwawakilisha kwa mujibu wa taratibu za uchaguzi.

Matokeo ya Uchaguzi Mdogo wa Jimbo la Chamwino yanatarajiwa kutoa Mbunge mpya ambaye atarithi nafasi hiyo na kuendeleza uwakilishi wa wananchi wa jimbo hilo katika Bunge la Jamhuri ya Muungano wa Tanzania.

Rais wa Jamhuri ya Muungano wa Tanzania, akipiga kura kwenye Kituo cha kupigia kura cha Ofisi ya Kijiji cha Chamwino mkoani Dodoma, tarehe 04 Novemba, 2026 katika Uchaguzi mdogo wa Ubunge wa Jimbo la Chamwino. Uchaguzi huo unafanyika kufuatia aliyekuwa Mbunge wa Jimbo hilo, Mhe. Deogratius Ndejembi kuteuliwa kuwa Makamu wa Rais wa Jamhuri ya Muungano wa Tanzania.

read more

 

 Dar es Salaam . Alute Mughwai Lissu, kaka wa Mwenyekiti wa Chama cha Demokrasia na Maendeleo (Chadema), Tundu Lissu, amefariki dunia katika Hospitali ya Rufaa ya Selian, mkoani Arusha.


Alute, ambaye alikuwa wakili mwandamizi na kada wa Chama cha Mapinduzi (CCM), amefariki dunia leo Jumapili, Novemba mosi, 2026, baada ya kuugua kwa muda mrefu.

Mwananchi imezungumza na Rose Masesa, dada wa Lissu, ambaye amethibitisha kifo hicho na kusema Alute alifariki baada ya hali yake kuwa mbaya.

"Ni kweli amefariki dunia katika Hospitali ya Rufaa ya Mkoa wa Arusha ya Selian, baada ya kuzidiwa ghafla juzi,” amesema Rose.

Rose, ambaye saa 4 asubuhi alikuwa safarini kutoka Songea, mkoani Ruvuma, kuelekea Arusha, amesema Alute alikuwa akisumbuliwa na ugonjwa wa figo kwa kipindi kirefu.


Alikuwa anafanyiwa dialysis. Hata ukimwona akija mahakamani kufuatilia kesi ya Lissu, alikuwa na kitu shingoni. Afya yake haikuwa nzuri sana,” amesema.

Amesema taarifa kuhusu maandalizi ya mazishi zitatolewa baada ya familia kufanya kikao.

Kwa upande wake, Mkurugenzi wa Mawasiliano na Uenezi wa Chadema, Brenda Rupia, amesema viongozi wa chama hicho walikuwa wakielekea gerezani kuzungumza na Mwenyekiti wao, Lissu, kabla ya kutoa taarifa rasmi kwa umma.


"Taarifa ni za kweli na sasa viongozi wetu wanaelekea gerezani kuonana na Mwenyekiti. Wakirudi, tutatoa taarifa kwa umma,” amesema.

Tundu Lissu anashikiliwa katika Gereza la Ukonga, Dar es Salaam, akikabiliwa na kesi ya uhaini ambayo imekuwa ikiendelea kwa zaidi ya mwaka mmoja.


Hukumu ya kesi hiyo inatarajiwa kutolewa Ijumaa, Novemba 6, 2026, katika Mahakama Kuu, Masjala Ndogo ya Dar es Salaam.

read more

 

Waziri Mkuu, Dkt. Mwigulu Nchemba, amewasili mkoani Kilimanjaro leo, Jumapili, Novemba 1, 2026, kumwakilisha Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan, katika ibada ya uzinduzi wa jengo jipya la Kanisa la Kiinjili la Kilutheri Tanzania (KKKT), Usharika wa Nshara, wilayani Hai.

 

Waziri Mkuu amepokelewa na Mkuu wa Mkoa wa Kilimanjaro, Nurdin Babu. Baadaye, alipowasili kanisani, amepokelewa na Mkuu wa KKKT, Askofu Dkt. Alex Malasusa, pamoja na Mkuu wa KKKT, Dayosisi ya Kaskazini, Askofu Dkt. Fredrick Onael Shoo.

read more

 

Kivutio cha Maporomoko ya Maji ya Napuru, kilichopo katika Shamba la Miti Meru jijini Arusha, kinachosimamiwa na Wakala wa Huduma za Misitu Tanzania (TFS), kimetwaa tuzo ya ubora katika vivutio vya asili na utalii wa maporomoko ya maji katika tuzo za East Africa Sustainability and Conservation Excellence Awards (ESCEA) 2026.

 

 

Tuzo hiyo ilikabidhiwa kwa TFS jana Oktoba 31, 2026, katika hafla iliyofanyika Hoteli ya Serena jijini Dar es Salaam, na Mkurugenzi wa Huduma Saidizi wa Wakala wa Taifa wa Hifadhi ya Chakula (NFRA), Mohamed Ally, aliyemwakilisha Mkurugenzi Mkuu wa wakala huo, Dkt. Andrew Komba.

 

 

Akizungumza katika hafla hiyo, Mohamed alisema tuzo hiyo ni utambuzi wa mchango wa TFS katika uongozi, ubunifu na juhudi za kuendeleza uhifadhi wa mazingira, matumizi endelevu ya rasilimali za asili na maendeleo endelevu katika Afrika Mashariki.

 

 

Kwa upande wake, Afisa Utalii wa Shamba la Miti Meru, Mhifadhi Masanja Kayanogu Juma, alisema tuzo hiyo ni chachu kwa TFS kuendelea kuimarisha juhudi za kulinda na kuhifadhi rasilimali za misitu zinazowezesha kuibua na kuendeleza vivutio vya utalii wa ikolojia.

 

 

Shamba la Miti Meru ni miongoni mwa maeneo yenye fursa za utalii wa ikolojia jijini Arusha, likiwa na Maporomoko ya Maji ya Napuru kama kivutio chake kikuu, kinachovutia wageni wanaotafuta uzoefu wa utalii unaotegemea urithi wa asili.

Hafla ya utoaji wa tuzo hizo iliwakutanisha viongozi wa Serikali, wafanyabiashara, wataalamu wa uhifadhi wa mazingira, wawekezaji, wadau wa utalii na wawakilishi wa mashirika mbalimbali kwa lengo la kutambua mafanikio katika uhifadhi na kuimarisha mahusiano ya kibiashara.

read more

Rais wa Jamhuri ya Muungano wa Tanzania, Dkt. Samia Suluhu Hassan, amefanya uteuzi wa viongozi mbalimbali wa Serikali na Taasisi za Umma, ikiwa ni pamoja na kumteua Bi. Angeline Lubala Mabula kuwa Mkuu wa Mkoa wa Tabora, pamoja na kuwateua Mwenyekiti na Makamu Mwenyekiti wapya wa Tume ya Haki za Binadamu na Utawala Bora.

Kwa mujibu wa taarifa rasmi kwa umma iliyotolewa leo, Oktoba 28, 2026, na Kaimu Mkurugenzi wa Mawasiliano ya Rais (Ikulu), Shaaban Kissu, kufuatia taarifa ya Katibu Mkuu Kiongozi Balozi Dkt. Moses Kusiluka.


Rais Samia amemteua Mbunge wa Zamani wa Jimbo la Ilemela mkoani Mwanza Bi. Angeline Mabula kuwa Mkuu wa Mkoa wa Tabora, akichukua nafasi ya Bw. Beno Morris Malisa ambaye uteuzi wake umetenguliwa.


Vilevile, Rais Samia amefanya uteuzi wa viongozi wakuu wa Tume ya Haki za Binadamu na Utawala Bora kwa kumteua Bw. Dunford George Mpelumbe kuwa Mwenyekiti wa Tume hiyo. Kabla ya uteuzi huo, Bw. Mpelumbe alikuwa Wakili wa Serikali katika Ofisi ya Mwanasheria Mkuu wa Serikaki ya Jamhuri ya Muungano wa Tanzania


MALISA

Mwanasheria Mkuu wa Serikali ya Jamhuri ya Muungano wa Tanzania. Bw. Mpelumbe anachukua nafasi ya Jaji Mstaafu Mathew Pauwa Mwaimu ambaye amemaliza muda wake wa utumishi.


Pia, Rais amemteua Bw. Omar Ali Omar kuwa Makamu Mwenyekiti wa Tume ya Haki za Binadamu na Utawala Bora. Kabla ya uteuzi huu, Bw. Omar alikuwa Mkuu wa Idara ya Utawala, Mipango na Fedha katika Taasisi ya Sayansi na Teknolojia Karume, Zanzibar, ambapo anachukua nafasi ya Bw. Mohamed Khamis Hamad ambaye naye amemaliza muda wake.

read more

 BALOZI wa Tanzania nchini Zimbabwe, Kamishna wa Polisi (CP) Suzan Kaganda, ameongoza harambee ya kuchangia ukarabati wa Kanisa la Kiinjili la Kilutheri Tanzania (KKKT), Dayosisi ya Magharibi Kati, Jimbo la Mashariki, Usharika wa Ndala, wilayani Nzega, mkoani Tabora, huku akisisitiza umuhimu wa malezi bora kwa watoto na mapambano dhidi ya vitendo vya ukatili wa kijinsia katika jamii.

Harambee hiyo imefanyika Oktoba 26, 2026, katika kanisa hilo lililopo Kata ya Ndala, ikiwa na lengo la kuchangisha fedha kwa ajili ya ukarabati mkubwa wa kanisa, ikiwemo uwekaji wa paa jipya na kuboresha mazingira ya ndani na nje ya nyumba hiyo ya ibada.

Akizungumza katika harambee hiyo, CP Kaganda amesisitiza kuwa jamii ina wajibu wa kuwalea watoto katika misingi bora ya dini na maadili, pamoja na kuwalinda dhidi ya vitendo vya ukatili, hususan ukatili wa kijinsia, ili kujenga jamii yenye maadili mema na inayoheshimu haki za kila mmoja.

Aidha, ameitaka jamii kumrudia Mungu, kuendelea kuliombea Taifa na viongozi wake ili waweze kutekeleza majukumu yao kwa hekima na uadilifu katika kuwaletea wananchi maendeleo na ustawi.

Kwa upande wake, mwakilishi wa Kamanda wa Polisi Mkoa wa Tabora, ambaye pia ni Mkuu wa Kikosi cha Usalama Barabarani Mkoa wa Tabora, Mrakibu Mwandamizi wa Polisi (SSP) Peter Magayane, amewataka wazazi na walezi kuwa mstari wa mbele kutoa taarifa za haraka kwa mamlaka husika kuhusu matukio ya ukatili wa kijinsia ili hatua stahiki za kisheria zichukuliwe dhidi ya wahusika.

Katika harambee hiyo, CP Kaganda amechangia kiasi cha fedha kilichosaidia kufikisha zaidi ya shilingi milioni 70 zilizochangwa kwa ajili ya shughuli hiyo.

Akizungumza kwa niaba ya Askofu Mkuu wa KKKT, Dayosisi ya Magharibi Kati, Mchungaji Patrick Katembo ametoa shukrani kwa CP Kaganda na washiriki wote wa harambee hiyo kwa mchango wao, huku akiahidi kuwa kanisa litaendelea kushirikiana na Jeshi la Polisi katika kudumisha amani, kuzuia uhalifu na kujenga jamii yenye maadili mema.

read more